Loading...
50 ni 80 onns?
Cura ch'ina gruppa da giuvens sportists ha fundau igl onn 1954 l'Uniun sportiva Breil era il sport da skis gia dapi varga 50 onns enconuschents el vitg silla terassa sulegliva. Sco la cronica dil club ch'ei gest cumparida far da saver, ein ils emprems skiunzs vegni a Breil avon 100 onns. Prospects da vacanzas da quei temps dattan perdetga. 1926 han 19 skiunzs fundau il Club de skiturs Breil e gia in onn pli tard ha la suprastonza inoltrau la damonda da vegnir recepida ella Uniun grischuna ed ella Uniun svizra da skiunzs.
Il Club de skiturs Breil ha giu avon la secunda uiara mundiala in temps fetg activ. Damai ch'ei deva secapescha negins runals a Breil, han ils skiunzs encuretg enzatgi che tili els ed han anflau ils cavals. Ellas gasettas havevan els legiu co ils rehs seschavan trer da cavals a S. Murezi ed Arosa. Cavals deva ei da quei temps avunda a Breil ed ils giuvenils ein sededicai al "skijöring". A Breil han schizun grondas concurrenzas da "skijoring "giu liug.
Duront la secunda uiara han ils umens giuvens da Breil giu auters quitaus ed il sport da skis ei vegnius negligius. Era suenter l'uiara ha igl interess muncau e 1949 ein mo sis commembers vegni alla radunonza generala. A caschun da quella radunonza han ils commembers decidiu d'extrar dalla Uniun grischuna da skiunzs ed in onn pli tard ha l'uniun giu neginas activitads.
Mo quater onns ein vargai ed ina gruppa da giuvenils ha fundau ina nova uniun culla finamira da promover il sport da skis. Quella uniun ei vegnida numnada Uniun sportiva Breil. Il sport da skis era daventaus pli populars e l'uniun nova ha profitau da quei, denton era dil grond engaschi. Gia igl emprem onn ha il club organisau ina cuorsa rapida e 45 skiunzs ein stai alla partenza. El protocol stat ei scret: "Malgrad la grischa dumengia da schaner han ins saviu far beinvegni a 45 skiturs ed amitgs". Ins ei propi staus surstaus dalla frequenza. Mo beinenqual ha survegniu empau battacor mon el dalla dira e lada pista siado viers las tegias dado dall'Alp Quader. Mo tut ei vargau senza rumper l'ossa, tgi cun bien cletg, tgi meins bien ed auters cun pigns discletgs. Tgi che manegia ch'ei detti pér ils davos onns negina neiv, quel sto leger la cronica dil Club da skis Breil. Igl onn 1957 ha la cuorsa stuiu vegnir sistida per munconza da neiv. Era 1964, 66 e 70 ei quei stau il cass.
Igl onn 1972 han runals e sutgeras transportau ils skiunzs dallas plauncas dil Péz d'Artgas siadora, ina nova era ha entschiet a Breil e per l'Uniun sportiva Breil. L'uniun ha midau num ed ei senumnada Club da skis Breil. 1975 ha l'Uniun grischuna da skiunzs surdau al club l'organisaziun dils campiunadis grischuns. "Mo ils commembers che han luvrau el comite d'organisaziun san tgei enorma lavur che las preparaziuns da quei campiunadi han caschunau. Era la lavur vid las pistas ei stada stentusa, pertgei las maschinas da pista da lu eran aunc buc aschi modernas. Perquei ha ei giu num luvrar bia cun pala e stria da neiv".
1981 1987 ein ils campiunadis svizzers dallas damas vegni organisai a Breil ed il territori da skis dil Péz d'Artgas ei vegnius pli e pli enconuschents. Bugen havessen ils da Breil organisau cuorsas dil cup mundial. Bunamein fuss ei era vegniu schi lunsch. La FIS ha numnadamein renumerau igl engaschi dil Club da skis Breil e surdau ina cuorsa rapida ed in super-G dallas damas. Igl onn 1990 haveva ei denton buca neiv a Breil e las cuorsas dil cup mundial ein vegnidas menadas atras el Valleis. Il medem onn ha ei dau ina secunda trumpada pil Club da skis Breil. Ensem cun Laax haveva Breil candidau pils campiunadis mundials da skis digl onn 1995. Ils campiunadis mundials ein vegni surdai a Sierra Nevada en Spagna.
Suenter quella terrada ei il Club da skis Breil secuntentaus culla organisaziun da cuorsas pli pintgas fan quei denton cul medem engaschi sco sch'ei fuss cuorsas dil cup mundial.