PORTRET

Ils 20 da november 1954 - pia avon 50 onnas - han 18 giuvens skiturs fundau L'uniun sportiva Breil, il Club da skis e snowboard Breil/Brigels dad oz. Ils biars dils fundaturs ein aunc oz en veta e per part aunc adina commembers activs u passivs da nies club. En respect ed engrazieivladad enviers quels piuniers ed era sco animaziun per in bien progress egl avegnir, havein festivau igl onn2004 il giubileum da 50 onns existenza.

Demai che l'Uniun sportiva Breil ei s'engaschada spirontamein pil sport da skis, vegn il num midaus en Club da skis Breil ed aunc pil tard en Club da skis e snowboard Breil/Brigels. Igl intent ei denton adina staus il medem e duei era vegnir mantenius egl avegnir tuttina.

L'actuala suprastonza selegra d'astgar passar igl avegnir ensemen cun biebein 180 commembras e commembers. La mischeida da giuven e vegl, umens dunnas, dattan a nus la caparra da guder da cuminonza ina buna ed emperneivla convivenza. A mintgina e mintgin che ha el decuors da quei miez tschentaner purschiu maun per segidar e luvrar, seigi engraziau cordialmein.

Cun la speronza dad era astgar quintar egl avegnir da commembras e commembers activs e fideivels, selegrein nus da caminar silla senda dil secund miez tschentaner, giavischond ch'il Club da skis e snowboard Breil/Brigels sappi era festivar l'existenta da 100 onns e buna prosperitad.